ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಗುಜರಾತ್ ಟೈಟಾನ್ಸ್ ವಿರುದ್ಧದ ಪಂದ್ಯವು ಆರ್‌ಸಿಬಿಗೆ ಈ ಸೀಸನ್‌ನ ಕೊನೆಯ ತವರು ಪಂದ್ಯವಾಗಿದ್ದು, ಭರ್ಜರಿ 5 ವಿಕೆಟ್ ಗೆಲುವಿನೊಂದಿಗೆ ವಿಶೇಷ ಕ್ಷಣವಾಗಿ ದಾಖಲಾಗಿದೆ. ಈ ಪಂದ್ಯದಲ್ಲಿ 81 ರನ್ ಸಿಡಿಸಿದ ವಿರಾಟ್ ಕೊಹ್ಲಿ ಪಂದ್ಯಶ್ರೇಷ್ಠ ಪ್ರಶಸ್ತಿಯನ್ನು ಪಡೆದು ಚಿನ್ನಸ್ವಾಮಿ ಬಗ್ಗೆ ಮನದಾಳದ ಮಾತುಗಳನ್ನು ಹಂಚಿಕೊಂಡರು.

“ನಾವು ಇಲ್ಲಿ ಐದು ಪಂದ್ಯಗಳನ್ನು ಆಡಲು ಸಾಧ್ಯವಾದುದು ಮತ್ತು ಅಭಿಮಾನಿಗಳು ತಂಡವನ್ನು ಮತ್ತೆ ಕಣ್ತುಂಬಿಕೊಳ್ಳಲು ಸಾಧ್ಯವಾದುದು ನಮಗೆ ತುಂಬಾ ಸಂತೋಷ ತಂದಿದೆ” ಎಂದು ಕೊಹ್ಲಿ ಹೇಳಿದರು. ಚಿನ್ನಸ್ವಾಮಿ ಕ್ರೀಡಾಂಗಣವು ಕ್ರಿಕೆಟ್ ಆಡಲು ಅತ್ಯಂತ ವಿಶೇಷ ಸ್ಥಳವಾಗಿದ್ದು, ತವರಿನಲ್ಲಿ ಆಡುತ್ತಾ ನಾಲ್ಕು ಗೆಲುವು ಸಾಧಿಸಿರುವುದು ಅದ್ಭುತ ಅನುಭವ ಎಂದು ಅವರು ಅಭಿಪ್ರಾಯಪಟ್ಟರು.

2025ರ ಜೂನ್ 4ರಂದು ನಡೆದ ಆರ್‌ಸಿಬಿ ಸಂಭ್ರಮಾಚರಣೆಯ ಕಾಲ್ತುಳಿತ ದುರಂತದ ನಂತರ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಕ್ರಿಕೆಟ್ ಚಟುವಟಿಕೆ ತಾತ್ಕಾಲಿಕವಾಗಿ ಸ್ಥಗಿತಗೊಂಡಿತ್ತು. ನಂತರ ನಡೆದ ಪರಿಶೀಲನೆ ಮತ್ತು ಸುರಕ್ಷತಾ ವರದಿಗಳ ಆಧಾರದಲ್ಲಿ ಗೃಹ ಸಚಿವರ ಅನುಮತಿಯಿಂದ ಮತ್ತೆ ಐಪಿಎಲ್ ಪಂದ್ಯಗಳಿಗೆ ಅವಕಾಶ ನೀಡಲಾಗಿತ್ತು. ಈ ಹಿನ್ನೆಲೆಯಲ್ಲಿ ಚಿನ್ನಸ್ವಾಮಿಗೆ ಕ್ರಿಕೆಟ್ ಮರಳಿರುವುದು ತಂಡ ಮತ್ತು ಅಭಿಮಾನಿಗಳಿಗೆ ಭಾವನಾತ್ಮಕ ಕ್ಷಣವಾಯಿತು ಎಂದು ಕೊಹ್ಲಿ ಹೇಳಿದರು.

“ನಾವು ಋತುವಿನ ನಂತರ ಮತ್ತೆ ಇಲ್ಲಿ ಆಡಲು ಸಾಧ್ಯವಾಗುತ್ತದೆ ಎಂದು ಆಶಿಸುತ್ತೇವೆ” ಎಂಬ ಆಶಾಭಾವನೆಯನ್ನು ಅವರು ವ್ಯಕ್ತಪಡಿಸಿದರು. ಬೆಂಗಳೂರಿನೊಂದಿಗೆ ತಮ್ಮ ಸಂಬಂಧದ ಬಗ್ಗೆ ಮಾತನಾಡಿದ ಕೊಹ್ಲಿ, “ಇಲ್ಲಿ ನನಗೆ ಯಾವಾಗಲೂ ಮನೆಯ ಅನುಭವ. ಈ ನಗರ ಮತ್ತು ಅಭಿಮಾನಿಗಳ ಪ್ರೀತಿ ಅಪಾರ” ಎಂದು ಹೇಳಿದರು.

ಅಂಡರ್-19 ವಿಶ್ವಕಪ್ ದಿನಗಳಿಂದ ಆರಂಭವಾದ ಬೆಂಗಳೂರಿನೊಂದಿಗಿನ ತಮ್ಮ ಬಾಂಧವ್ಯ, 2008ರ ಐಪಿಎಲ್ ಹರಾಜಿನಿಂದ ಆರ್‌ಸಿಬಿ ಸೇರಿದ ಕ್ಷಣ ಮತ್ತು ಇಂದಿನವರೆಗೆ ಮುಂದುವರೆದ ಪ್ರಯಾಣವನ್ನು ಅವರು ಸ್ಮರಿಸಿದರು. “ಆರ್‌ಸಿಬಿ ನನಗೆ ಎಲ್ಲವನ್ನೂ ನೀಡಿದೆ, ನಾನು ಯಾವಾಗಲೂ ಈ ತಂಡಕ್ಕಾಗಿ ಆಡುತ್ತೇನೆ” ಎಂದು ಅವರು ಭಾವನಾತ್ಮಕವಾಗಿ ಹೇಳಿದರು.

ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಗುಜರಾತ್ ಟೈಟಾನ್ಸ್, ಸಾಯಿ ಸುದರ್ಶನ್ ಅವರ ಶತಕದ ನೆರವಿನಿಂದ 205 ರನ್ ಗಳಿಸಿತು. ಆದರೆ ವಿರಾಟ್ ಕೊಹ್ಲಿ (81) ಮತ್ತು ದೇವದತ್ ಪಡಿಕ್ಕಲ್ ಅವರ ಅಬ್ಬರದ ಬ್ಯಾಟಿಂಗ್ ನೆರವಿನಿಂದ ಆರ್‌ಸಿಬಿ 18.5 ಓವರ್‌ಗಳಲ್ಲಿ 206 ರನ್ ಗಳಿಸಿ ಗೆಲುವು ಸಾಧಿಸಿತು. ಇದು ಚಿನ್ನಸ್ವಾಮಿಯಲ್ಲಿನ ಸೀಸನ್‌ಗೆ ಸ್ಮರಣೀಯ ಅಂತ್ಯವಾಯಿತು