ಮಂಗಳವಾರದಿಂದ ಅಧಿಕೃತವಾಗಿ ತಮ್ಮ ಕಾರ್ಯಭಾರ ಆರಂಭಿಸಿರುವ ತಮನ್ನಾ, “ಮೈಸೂರು ಸ್ಯಾಂಡಲ್ ಸೋಪ್ ಕೇವಲ ಒಂದು ಉತ್ಪನ್ನವಲ್ಲ, ಇದು ನಮ್ಮ ಬಾಲ್ಯದ ನೆನಪುಗಳ ಜೊತೆ ಬೆಸೆದುಕೊಂಡಿರುವ ಭಾವನೆ” ಎಂದು ಹೇಳಿದ್ದಾರೆ.

ಈ ನೇಮಕಾತಿ ಸಾಮಾಜಿಕ ಜಾಲತಾಣಗಳಲ್ಲಿ ದೊಡ್ಡ ಮಟ್ಟದ ಚರ್ಚೆಗೆ ಕಾರಣವಾಗಿದೆ. ಮಾಹಿತಿ ಪ್ರಕಾರ, ತಮನ್ನಾ ಭಾಟಿಯಾ ಅವರಿಗೆ ಎರಡು ವರ್ಷಗಳ ಅವಧಿಗೆ ಸುಮಾರು 6 ಕೋಟಿ ರೂಪಾಯಿ ಸಂಭಾವನೆ ನೀಡಲಾಗಿದೆ. ಕರ್ನಾಟಕದ ಪರಂಪರೆಯ ಉತ್ಪನ್ನಕ್ಕೆ ಬೇರೆ ಭಾಷೆಯ ನಟಿಯನ್ನು ರಾಯಭಾರಿಯಾಗಿ ಆಯ್ಕೆ ಮಾಡಿರುವುದು ಎಷ್ಟು ಸೂಕ್ತ ಎಂಬ ಪ್ರಶ್ನೆಯನ್ನು ಕೆಲವರು ಎತ್ತಿದ್ದಾರೆ. ವಿಶೇಷವಾಗಿ 6 ಕೋಟಿ ಸಂಭಾವನೆ ವಿಚಾರವಾಗಿ ಕೆಲ ವರ್ಗದ ಜನರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇನ್ನೊಂದೆಡೆ, ಮಾರುಕಟ್ಟೆ ತಂತ್ರಗಾರಿಕೆಯ ದೃಷ್ಟಿಯಿಂದ ನೋಡಿದರೆ ಜನಪ್ರಿಯ ಮುಖಗಳ ಅಗತ್ಯವಿದೆ ಎಂಬ ಅಭಿಪ್ರಾಯವೂ ಕೇಳಿಬರುತ್ತಿದೆ. ದೇಶಾದ್ಯಂತ ಗುರುತಿಸಿಕೊಂಡಿರುವ ತಮನ್ನಾ ಭಾಟಿಯಾ ಅವರಂತಹ ಸೆಲೆಬ್ರಿಟಿಗಳು ಉತ್ಪನ್ನದ ಮಾರುಕಟ್ಟೆ ವ್ಯಾಪ್ತಿಯನ್ನು ವಿಸ್ತರಿಸಲು ಸಹಕಾರಿಯಾಗುತ್ತಾರೆ ಎಂದು ಬೆಂಬಲಿಗರು ಹೇಳುತ್ತಿದ್ದಾರೆ. ಬೆಳೆಯುತ್ತಿರುವ ಸ್ಪರ್ಧಾತ್ಮಕ ಮಾರುಕಟ್ಟೆಯಲ್ಲಿ ಬ್ರಾಂಡ್‌ಗಳಿಗೆ ಇಂತಹ ಕ್ರಮಗಳು ಅಗತ್ಯವೆಂಬ ಮಾತುಗಳೂ ಕೇಳಿಬರುತ್ತಿವೆ.

ಈ ಎಲ್ಲಾ ಚರ್ಚೆಗಳ ನಡುವೆ ಸುಮಾರು 22 ವರ್ಷಗಳ ಹಿಂದಿನ ಮೈಸೂರು ಸ್ಯಾಂಡಲ್ ಸೋಪಿನ ಕಪ್ಪು-ಬಿಳುಪು ಜಾಹೀರಾತು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. “ನೋಡಿ ನಮ್ಮ ಸೋಪು” ಎಂಬ ಸಾಲಿನಿಂದ ಪ್ರಾರಂಭವಾಗುವ ಆ ಜಾಹೀರಾತಿನಲ್ಲಿ, ಸೋಪ್ ಖರೀದಿಸಲು ಸರದಿಯಲ್ಲಿ ನಿಂತಿರುವ ಜನರ ಕಾರ್ಟೂನ್ ಚಿತ್ರಣ ಗಮನ ಸೆಳೆಯುತ್ತಿದೆ.

ಆ ಜಾಹೀರಾತಿನ ಸಾಲುಗಳು ಇಂದಿಗೂ ನೆನಪಿನಲ್ಲೇ ಉಳಿದಿವೆ –
“ಕ್ಯೂ ನಿಂತು ಬೇಸತ್ತಾಗ ನಿಮ್ಮ ದೇಹ ಮನಸ್ಸು ಎರಡೂ ನೆಮ್ಮದಿಯಿಂದಿರುವುದಿಲ್ಲ ಅಲ್ಲವೇ? ಮನಸ್ಸಿಗೆ ಉಲ್ಲಾಸವನ್ನು, ದೇಹಕ್ಕೆ ಚೈತನ್ಯವನ್ನೂ ಕೊಡುವ ಸಾಧನವೆಂದರೆ ಸ್ನಾನ. ಸ್ನಾನಕ್ಕೆ ಮೈಸೂರು ಸ್ಯಾಂಡಲ್ ಸೋಪು ಮರೆಯಬೇಡಿ ಮತ್ತೆ. ದೇಹದ ಕಲ್ಮಶವನ್ನು ನಿವಾರಿಸುವುದಲ್ಲದೇ ಮೃದು ಮಧುರವಾದ ಸುವಾಸನೆಯನ್ನು ಕೊಡುತ್ತದೆ.”

ಹಳೆಯ ಜಾಹೀರಾತಿನ ಸರಳತೆ ಮತ್ತು ಸುವಾಸನೆಯ ಮೇಲಿನ ನಂಬಿಕೆ ಇಂದು ಮತ್ತೆ ನೆಟ್ಟಿಗರ ಮನಸೆಳೆಯುತ್ತಿದೆ. “ಆಗ ರೂಪದರ್ಶಿಗಳ ಅವಶ್ಯಕತೆ ಇರಲಿಲ್ಲ, ಸೋಪಿನ ಪರಿಮಳವೇ ಸಾಕಿತ್ತು” ಎಂಬ ಕಾಮೆಂಟ್‌ಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ.

ಒಟ್ಟಿನಲ್ಲಿ, ತಮನ್ನಾ ನೇಮಕಾತಿ ಒಂದು ಕಡೆ ಆಧುನಿಕ ಮಾರುಕಟ್ಟೆ ತಂತ್ರಗಾರಿಕೆಯ ಪ್ರತೀಕವಾಗಿದ್ದರೆ, ಹಳೆಯ ಜಾಹೀರಾತು ಬ್ರಾಂಡ್‌ನ ಪರಂಪರೆ ಮತ್ತು ಭಾವನಾತ್ಮಕ ನಂಟನ್ನು ಮತ್ತೆ ನೆನಪಿಗೆ ತರುತ್ತಿದೆ. ಮೈಸೂರು ಸ್ಯಾಂಡಲ್ ಸೋಪ್ ಇದೀಗ ಹೊಸ ಮುಖದೊಂದಿಗೆ, ಹಳೆಯ ಸುವಾಸನೆಯ ನೆನಪನ್ನು ಜೊತೆಯಾಗಿ ಮುಂದುವರಿಯುತ್ತಿದೆ.