ರ‍್ಯಾಪಿಡೋ ಅಪಘಾತ ಪ್ರಕರಣ: ಸಾನಿ ಕೃಷ್ಣ ಹೋರಾಟಕ್ಕೆ ಭಾಗಶಃ ಜಯ

ಬೆಂಗಳೂರು, ಆಗಸ್ಟ್‌ 14: ರ‍್ಯಾಪಿಡೋ ಬೈಕ್‌ ಟ್ಯಾಕ್ಸಿ ಪ್ರಯಾಣದ ವೇಳೆ ಸಂಭವಿಸಿದ ಭೀಕರ ಅಪಘಾತದಲ್ಲಿ ಗಂಭೀರವಾಗಿ ಗಾಯಗೊಂಡು ಕಳೆದ ಎರಡು ತಿಂಗಳಿಂದ ಚಿಕಿತ್ಸೆ ಪಡೆಯುತ್ತಿರುವ ಬೆಂಗಳೂರಿನ 32 ವರ್ಷದ ಇಂಟೀರಿಯರ್‌ ಡಿಸೈನರ್‌ ಸಾನಿ ಕೃಷ್ಣ ಅವರ ಹೋರಾಟಕ್ಕೆ ಇದೀಗ ಮಹತ್ವದ ಬೆಳವಣಿಗೆ ಸಿಕ್ಕಿದೆ.

ಅಪಘಾತದ ಬಳಿಕ ಎದುರಾದ ಭಾರೀ ವೈದ್ಯಕೀಯ ವೆಚ್ಚದ ಹಿನ್ನೆಲೆಯಲ್ಲಿ ಸಾನಿ ಹಾಗೂ ಅವರ ಕುಟುಂಬ ನಡೆಸುತ್ತಿದ್ದ ಹೋರಾಟಕ್ಕೆ ಸ್ಪಂದಿಸಿರುವ ರ‍್ಯಾಪಿಡೋ, ಸಾಮಾನ್ಯ ವಿಮಾ ಮಿತಿಯನ್ನು ಮೀರಿ ಸಾನಿ ಅವರ ಸಂಪೂರ್ಣ ವೈದ್ಯಕೀಯ ಚಿಕಿತ್ಸಾ ವೆಚ್ಚವನ್ನು ವಿಮಾ ಪಾಲುದಾರರ ಮೂಲಕ ಭರಿಸಲು ಒಪ್ಪಿಕೊಂಡಿದೆ ಎಂದು ವರದಿಯಾಗಿದೆ.

ಜೂನ್‌ 17ರಂದು ನಡೆದಿದ್ದ ಭೀಕರ ಅಪಘಾತ

ಜೂನ್‌ 17ರಂದು ಸಾನಿ ಕೃಷ್ಣ ಅವರು ರ‍್ಯಾಪಿಡೋ ಬೈಕ್‌ ಟ್ಯಾಕ್ಸಿಯಲ್ಲಿ ಬೈರಸಂದ್ರದಿಂದ ಡೊಮ್ಲೂರಿನಲ್ಲಿರುವ ತಮ್ಮ ಕಚೇರಿಗೆ ತೆರಳುತ್ತಿದ್ದರು. ಈ ವೇಳೆ ಸಂಭವಿಸಿದ ಅಪಘಾತದಲ್ಲಿ ಟ್ರ್ಯಾಕ್ಟರ್‌ ಅವರ ಮೇಲೆ ಹರಿದ ಪರಿಣಾಮ ಸಾನಿ ಗಂಭೀರವಾಗಿ ಗಾಯಗೊಂಡಿದ್ದರು.

ಅಪಘಾತದಲ್ಲಿ ಮುಖದ ಮೂಳೆಗಳಿಗೆ ಗಂಭೀರ ಹಾನಿಯಾಗಿದ್ದು, ಹಲವು ಹಲ್ಲುಗಳು ಉದುರಿದ್ದವು. ಏಳು ಪಕ್ಕೆಲುಬುಗಳಿಗೂ ತೀವ್ರ ಪೆಟ್ಟಾಗಿತ್ತು. ಬಳಿಕ ಪ್ಲಾಸ್ಟಿಕ್‌ ಸರ್ಜರಿ ಸೇರಿದಂತೆ ಹಲವು ಶಸ್ತ್ರಚಿಕಿತ್ಸೆಗಳಿಗೆ ಅವರು ಒಳಗಾಗಬೇಕಾಯಿತು.

ನಿರಂತರ ಚಿಕಿತ್ಸೆಯಿಂದಾಗಿ ವೈದ್ಯಕೀಯ ವೆಚ್ಚ ₹20 ಲಕ್ಷಕ್ಕೂ ಅಧಿಕವಾಗಿದೆ. ಇದರ ನಡುವೆ ಚಿಕಿತ್ಸಾ ವೆಚ್ಚವನ್ನು ಭರಿಸುವುದು ಕುಟುಂಬಕ್ಕೆ ದೊಡ್ಡ ಆರ್ಥಿಕ ಸವಾಲಾಗಿ ಪರಿಣಮಿಸಿತ್ತು.

₹1 ಲಕ್ಷ ವಿಮಾ ಮಿತಿಗೆ ಸಾನಿ ವಿರೋಧ

ಸಾಮಾನ್ಯವಾಗಿ ರ‍್ಯಾಪಿಡೋ ಗ್ರಾಹಕರಿಗೆ ಲಭ್ಯವಿರುವ ವಿಮಾ ರಕ್ಷಣೆಯ ಗರಿಷ್ಠ ಮಿತಿ ₹1 ಲಕ್ಷ ಎನ್ನಲಾಗಿತ್ತು. ಆರಂಭದಲ್ಲಿ ಈ ಮಿತಿಯೊಳಗೆ ಮಾತ್ರ ಪರಿಹಾರ ನೀಡಲು ಸಾಧ್ಯ ಎಂಬ ನಿಲುವನ್ನು ಸಂಸ್ಥೆ ಹೊಂದಿತ್ತು.

ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ಸಾನಿ ಪರ ವಕೀಲರು, ಆಗಸ್ಟ್‌ 6ರಂದು ರ‍್ಯಾಪಿಡೋಗೆ ಕಾನೂನು ನೋಟಿಸ್ ಕಳುಹಿಸಿ, ಸಂಪೂರ್ಣ ವೈದ್ಯಕೀಯ ವೆಚ್ಚ ಭರಿಸುವುದರ ಜೊತೆಗೆ ಬೇಷರತ್‌ ಕ್ಷಮೆಯಾಚನೆಗೂ ಒತ್ತಾಯಿಸಿದ್ದರು.

ಕೊನೆಗೂ ಚಿಕಿತ್ಸಾ ವೆಚ್ಚ ಭರಿಸಲು ರ‍್ಯಾಪಿಡೋ ಒಪ್ಪಿಗೆ

ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿರುವ ರ‍್ಯಾಪಿಡೋ, ಇದೊಂದು ಅಸಾಮಾನ್ಯ ಹಾಗೂ ಅತ್ಯಂತ ಕಠಿಣ ಪರಿಸ್ಥಿತಿ ಎಂದು ತಿಳಿಸಿ, ಸಾಮಾನ್ಯ ವಿಮಾ ಮಿತಿಯನ್ನು ಬದಿಗಿಟ್ಟು ಸಾನಿ ಅವರ ಅಗತ್ಯ ವೈದ್ಯಕೀಯ ವೆಚ್ಚವನ್ನು ಭರಿಸುವುದಾಗಿ ತಿಳಿಸಿದೆ.

ಅಗತ್ಯ ದಾಖಲೆಗಳ ಪರಿಶೀಲನೆಯ ಬಳಿಕ ವಿಮಾ ಪಾಲುದಾರರ ಮೂಲಕ ಸಂಪೂರ್ಣ ಚಿಕಿತ್ಸಾ ವೆಚ್ಚವನ್ನು ಪಾವತಿಸುವುದಾಗಿ ಸಂಸ್ಥೆ ಒಪ್ಪಿಕೊಂಡಿದೆ. ಈ ಬೆಳವಣಿಗೆ ಸಾನಿ ಕುಟುಂಬಕ್ಕೆ ಕೊಂಚ ನೆಮ್ಮದಿ ತಂದಿದೆ.

“ಕ್ಷಮೆಯಾಚಿಸುವವರೆಗೆ ನನ್ನ ಹೋರಾಟ ನಿಲ್ಲದು”

ಆದರೆ ವೈದ್ಯಕೀಯ ವೆಚ್ಚ ಭರಿಸಲು ರ‍್ಯಾಪಿಡೋ ಒಪ್ಪಿಕೊಂಡಿರುವುದರಿಂದ ಮಾತ್ರ ತಮ್ಮ ಹೋರಾಟ ಅಂತ್ಯವಾಗುವುದಿಲ್ಲ ಎಂದು ಸಾನಿ ಕೃಷ್ಣ ಸ್ಪಷ್ಟಪಡಿಸಿದ್ದಾರೆ.

“ರ‍್ಯಾಪಿಡೋ ಸಂಸ್ಥೆ ಈ ನಿರ್ಧಾರವನ್ನು ನನಗೆ ಇನ್ನೂ ಅಧಿಕೃತವಾಗಿ ಲಿಖಿತ ರೂಪದಲ್ಲಿ ತಿಳಿಸಿಲ್ಲ. ಅಪಘಾತದ ಜವಾಬ್ದಾರಿ ಹೊತ್ತು ಈವರೆಗೆ ಕ್ಷಮೆಯಾಚನೆಯನ್ನೂ ಮಾಡಿಲ್ಲ. ಸಂಸ್ಥೆ ಅಧಿಕೃತವಾಗಿ ಕ್ಷಮೆಯಾಚಿಸುವವರೆಗೆ ನನ್ನ ಹೋರಾಟ ಮುಂದುವರಿಯಲಿದೆ” ಎಂದು ಅವರು ಹೇಳಿದ್ದಾರೆ.

ಇದೇ ವೇಳೆ, ಅಪಘಾತಕ್ಕೆ ಕಾರಣವಾದ ಬೈಕ್‌ ಚಾಲಕನ ಪರವಾನಗಿ ಹಾಗೂ ಆತನ ನಡವಳಿಕೆ ಕುರಿತು ತನಿಖೆ ನಡೆಯುತ್ತಿದೆ ಎಂದು ರ‍್ಯಾಪಿಡೋ ತಿಳಿಸಿದೆ.

ಒಟ್ಟಿನಲ್ಲಿ, ತಿಂಗಳುಗಳ ಕಾಲ ಚಿಕಿತ್ಸೆ, ಭಾರೀ ವೈದ್ಯಕೀಯ ವೆಚ್ಚ ಹಾಗೂ ನ್ಯಾಯಕ್ಕಾಗಿ ನಡೆದ ಹೋರಾಟದ ನಡುವೆ ರ‍್ಯಾಪಿಡೋ ತೆಗೆದುಕೊಂಡಿರುವ ಈ ನಿರ್ಧಾರ ಸಾನಿ ಕೃಷ್ಣ ಕುಟುಂಬಕ್ಕೆ ದೊಡ್ಡ ಆರ್ಥಿಕ ಹೊರೆ ಕಡಿಮೆ ಮಾಡುವ ನಿರೀಕ್ಷೆ ಮೂಡಿಸಿದೆ. ಆದರೆ ಪರಿಹಾರದ ಜೊತೆಗೆ ಅಧಿಕೃತ ಕ್ಷಮೆಯಾಚನೆಗೂ ಸಾನಿ ಪಟ್ಟು ಹಿಡಿದಿರುವುದು ಪ್ರಕರಣಕ್ಕೆ ಮತ್ತೊಂದು ತಿರುವು ನೀಡಿದೆ.