ಸರ್ಕಾರಿ ಆಸ್ಪತ್ರೆ ಎಂದರೆ ಚಿಕಿತ್ಸೆಗಿಂತಲೂ ಊಟದ ಗುಣಮಟ್ಟದ ಬಗ್ಗೆ ಹೆಚ್ಚಿನ ದೂರುಗಳು ಕೇಳಿಬರುತ್ತಿದ್ದವು. ಇದೇ ಕಾರಣಕ್ಕೆ ಆರೋಗ್ಯ ಇಲಾಖೆ ಸರ್ಕಾರಿ ಆಸ್ಪತ್ರೆಗಳಲ್ಲಿ ರೋಗಿಗಳಿಗೆ ನೀಡುವ ಆಹಾರದ ವ್ಯವಸ್ಥೆಯನ್ನು ಸುಧಾರಿಸಲು ಮುಂದಾಗಿದೆ. ಈ ನಿಟ್ಟಿನಲ್ಲಿ ಇಸ್ಕಾನ್ ಸಂಸ್ಥೆಯೊಂದಿಗೆ ಒಪ್ಪಂದ ಮಾಡಿಕೊಂಡು ಹೊಸ ಮಾದರಿಯ ಆಹಾರ ವಿತರಣೆಗೆ ಚಾಲನೆ ನೀಡಲಾಗಿದೆ.

ಹೊಸ ವ್ಯವಸ್ಥೆಯಿಂದ ರೋಗಿಗಳಿಗೆ ರುಚಿಕರ ಮತ್ತು ಪೌಷ್ಟಿಕ ಆಹಾರ ಸಿಗಲಿದೆ ಎಂಬ ನಿರೀಕ್ಷೆ ಮೂಡಿದ್ದರೂ, ಇದೀಗ ಇದೇ ವ್ಯವಸ್ಥೆ ಮತ್ತೊಂದು ದೊಡ್ಡ ಚರ್ಚೆಗೆ ಕಾರಣವಾಗಿದೆ. ಅದೇನೆಂದರೆ – ಮೊಟ್ಟೆ ಭಾಗ್ಯಕ್ಕೆ ಬ್ರೇಕ್.

ಮೊಟ್ಟೆ ಬದಲು ಸೋಯಾ?

ಇದುವರೆಗೆ ಸರ್ಕಾರಿ ಆಸ್ಪತ್ರೆಗಳಲ್ಲಿ ರಾಷ್ಟ್ರೀಯ ಮೊಟ್ಟೆ ಯೋಜನೆ (National Egg Scheme) ಅಡಿಯಲ್ಲಿ ರೋಗಿಗಳಿಗೆ ಊಟದ ಜೊತೆ ಒಂದು ಮೊಟ್ಟೆ ನೀಡಲಾಗುತ್ತಿತ್ತು. ಇದು ಬಡ ಹಾಗೂ ಪೌಷ್ಟಿಕಾಂಶ ಕೊರತೆಯಿರುವ ರೋಗಿಗಳಿಗೆ ಮುಖ್ಯ ಪ್ರೋಟೀನ್ ಮೂಲವಾಗಿತ್ತು.

ಆದರೆ ಇಸ್ಕಾನ್ ಸಂಸ್ಥೆ ಶುದ್ಧ ಸಸ್ಯಾಹಾರಿ ಆಹಾರ ವಿತರಣೆ ಮಾಡುವ ಹಿನ್ನೆಲೆ, ಹೊಸ ಮೆನುವಿನಲ್ಲಿ ಮೊಟ್ಟೆಯನ್ನು ಕೈಬಿಟ್ಟು ಅದರ ಬದಲಿಗೆ ಸೋಯಾ ಚಂಕ್ಸ್ ಅನ್ನು ಸೇರಿಸಲಾಗಿದೆ. ಇದರಿಂದ ಸರ್ಕಾರಿ ಆಸ್ಪತ್ರೆಗಳಲ್ಲಿ ಮೊಟ್ಟೆ ನೀಡುವ ವ್ಯವಸ್ಥೆ ಸ್ಥಗಿತಗೊಂಡಂತಾಗಿದೆ.

ಯಾವ ಆಸ್ಪತ್ರೆಗಳಲ್ಲಿ ಬದಲಾವಣೆ?

ನಗರದ ಕೆಸಿ ಜನರಲ್ ಆಸ್ಪತ್ರೆ, ಜಯನಗರ ಜನರಲ್ ಆಸ್ಪತ್ರೆ ಹಾಗೂ ಸಿವಿ ರಾಮನ್ ಆಸ್ಪತ್ರೆಗಳಲ್ಲಿ ಕಳೆದ ಆರು ತಿಂಗಳ ಹಿಂದೆಯೇ ಈ ಹೊಸ ಮೆನು ಜಾರಿಗೆ ಬಂದಿದೆ. ಇದೀಗ ಇದೇ ಮಾದರಿಯನ್ನು ರಾಜ್ಯದ ಇತರೆ ಸರ್ಕಾರಿ ಆಸ್ಪತ್ರೆಗಳಿಗೂ ವಿಸ್ತರಿಸಲು ಆರೋಗ್ಯ ಇಲಾಖೆ ಆದೇಶ ಹೊರಡಿಸಿದೆ.

ಆಸ್ಪತ್ರೆಗಳಲ್ಲಿ ಗೊಂದಲ

ಮೊಟ್ಟೆ ರಾಷ್ಟ್ರೀಯ ಪೌಷ್ಟಿಕಾಂಶ ಯೋಜನೆಯ ಭಾಗವಾಗಿರುವುದರಿಂದ, ಅದನ್ನು ಸಂಪೂರ್ಣವಾಗಿ ಕೈಬಿಡಬಹುದೇ ಅಥವಾ ಪ್ರತ್ಯೇಕವಾಗಿ ಬೇಯಿಸಿ ನೀಡಬೇಕೇ ಎಂಬ ಗೊಂದಲಕ್ಕೆ ಆಸ್ಪತ್ರೆಗಳು ಸಿಲುಕಿವೆ. ಇಸ್ಕಾನ್ ಜೊತೆಗಿನ ಒಪ್ಪಂದದ ಮೆನುವಿನಲ್ಲಿ ಮೊಟ್ಟೆ ಇಲ್ಲದ ಕಾರಣ, ಸದ್ಯ ಹಲವೆಡೆ ಮೊಟ್ಟೆ ನೀಡುವುದೇ ನಿಲ್ಲಿಸಲಾಗಿದೆ.

ಹಳೆಯ ಮೆನು (ಸರ್ಕಾರಿ ಆಸ್ಪತ್ರೆ)

• ಬೆಳಗಿನ ಉಪಹಾರ: ಹಾಲು, ಕಾಫಿ/ಟೀ, ಬ್ರೆಡ್, ಉಪ್ಪಿಟ್ಟು

• ಮಧ್ಯಾಹ್ನ & ರಾತ್ರಿ: ಅನ್ನ-ಸಾಂಬಾರ್, ಚಪಾತಿ, ಪಲ್ಯ, ಹಣ್ಣುಗಳು, ಹಾಲು, ಮೊಟ್ಟೆ

ಇಸ್ಕಾನ್ ಮೆನು

• ಬೆಳಗಿನ ಉಪಹಾರ: ಚಿತ್ರಾನ್ನ, ರೊಟ್ಟಿ, ಉಪ್ಪಿಟ್ಟು, ಪೌಷ್ಟಿಕ ಕಾಳುಗಳು

• ಮಧ್ಯಾಹ್ನ & ರಾತ್ರಿ: ಮುದ್ದೆ, ಅನ್ನ, ಸಾಂಬಾರ್, ಪಲ್ಯ, ಸೋಯಾ, ರೋಟಿ, ಚಪಾತಿ, ಪಾಯಸ, ಸಾಗು, ಹಣ್ಣುಗಳು, ಹಣ್ಣಿನ ಜ್ಯೂಸ್

ಡಯೆಟ್ ಫುಡ್ ವೆಚ್ಚ

• ಜನರಲ್ ಡಯೆಟ್: ₹183

• ಥೆರಪಿ ರೋಗಿಗಳು: ₹210

• ಗರ್ಭಿಣಿ/ಬಾಣಂತಿ: ₹225

• ಮಕ್ಕಳು: ₹170

ಒಟ್ಟಿನಲ್ಲಿ…

ಸರ್ಕಾರಿ ಆಸ್ಪತ್ರೆಗಳಲ್ಲಿ ರೋಗಿಗಳಿಗೆ ಉತ್ತಮ, ರುಚಿಕರ ಹಾಗೂ ಪೌಷ್ಟಿಕ ಆಹಾರ ಒದಗಿಸುವ ಉದ್ದೇಶ ಶ್ಲಾಘನೀಯವೇ ಸರಿ. ಆದರೆ ಈ ಬದಲಾವಣೆಯ ಹೆಸರಲ್ಲಿ ಮೊಟ್ಟೆಯಂತಹ ಪ್ರಮುಖ ಪೌಷ್ಟಿಕ ಆಹಾರವನ್ನು ಕೈಬಿಟ್ಟಿರುವುದು ಎಷ್ಟರ ಮಟ್ಟಿಗೆ ಸಮಂಜಸ ಎಂಬ ಪ್ರಶ್ನೆ ಇದೀಗ ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.