ಬೆಳಗಾವಿ ಗ್ರಾಮೀಣ ಕ್ಷೇತ್ರದಲ್ಲಿ ಸಚಿವರಿಗೆ ಚಿನ್ನದ ಸರ ಹಾಕಿ ಅದ್ಧೂರಿ ಸನ್ಮಾನ!

ತಾಲೂಕಿನ ಕೊಂಡಸಕೊಪ್ಪ ಗ್ರಾಮದಲ್ಲಿ ಸುಮಾರು ಒಂದೂವರೆ ಕೋಟಿ ರೂ. ವೆಚ್ಚದಲ್ಲಿ ನೂತನವಾಗಿ ನಿರ್ಮಿಸಲಾದ ವಿಠ್ಠಲ ಬೀರ ದೇವರ ಮತ್ತು ಬಾಗುಬಾಯಿ ದೇವಸ್ಥಾನವನ್ನು ಶುಕ್ರವಾರ ಅದ್ಧೂರಿಯಾಗಿ ಉದ್ಘಾಟಿಸಲಾಯಿತು.

ಗ್ರಾಮಸ್ಥರಿಂದ ಅಭೂತಪೂರ್ವ ಸನ್ಮಾನ: ಸಚಿವರ ಕಾರ್ಯವೈಖರಿಗೆ ಮೆಚ್ಚುಗೆ ವ್ಯಕ್ತಪಡಿಸಿದ ಗ್ರಾಮಸ್ಥರು, ‘ನುಡಿದಂತೆ ನಡೆದ ತಾಯಿ’ ಎಂಬ ಘೋಷಣೆಯಡಿ ಗ್ರಾಮದಾದ್ಯಂತ ತೆರೆದ ವಾಹನದಲ್ಲಿ ಲಕ್ಷ್ಮೀ ಹೆಬ್ಬಾಳಕರ್ ಅವರ ಮೆರವಣಿಗೆ ನಡೆಸಿದರು. ಸಮಾರಂಭದಲ್ಲಿ ಸಚಿವರಿಗೆ ಭಕ್ತಿಯ ಸಂಕೇತವಾಗಿ ಚಿನ್ನದ ಸರ ಹಾಕಿ, ವಿಶೇಷವಾಗಿ ಸನ್ಮಾನಿಸಿ ತಮ್ಮ ಪ್ರೀತಿಯನ್ನು ವ್ಯಕ್ತಪಡಿಸಿದರು.

ಭಾವಪರವಶರಾದ ಸಚಿವರು: ಸನ್ಮಾನ ಸ್ವೀಕರಿಸಿ ಭಾವುಕರಾಗಿ ಮಾತನಾಡಿದ ಸಚಿವರು, "ಹಿಂದೆ ಗುಡಿ ಕಟ್ಟಿಸಿಕೊಡುವುದಾಗಿ ಹೇಳಿದಾಗ ನೀವು ಚಪ್ಪಾಳೆ ಹೊಡೆದಿದ್ದಿರಿ. ಆಗ ನಾನು ಕೆಲಸ ಮುಗಿದ ಮೇಲೆ ಚಪ್ಪಾಳೆ ತಟ್ಟಿ ಎಂದಿದ್ದೆ. ಇಂದು ದೇವಸ್ಥಾನ ಉದ್ಘಾಟನೆಯಾಗಿದ್ದು, ನಿಮ್ಮ ಈ ಸಂಭ್ರಮಕ್ಕೆ ಬೆಲೆ ಕಟ್ಟಲಾಗದು. ಈ ಪ್ರೀತಿಯೇ ನನ್ನ ಶಕ್ತಿ," ಎಂದರು.

ತಮ್ಮ ಜೀವನದ ಕಠಿಣ ದಿನಗಳನ್ನು ಸ್ಮರಿಸಿದ ಅವರು, "ದೊಡ್ಡ ಅಪಘಾತವಾದರೂ ದೇವರು ನನ್ನನ್ನು ಉಳಿಸಿದ್ದೇ ನಿಮ್ಮ ಸೇವೆ ಮಾಡಲು. ಜನರ ಸೇವೆ ಮಾಡುವ ಸೌಭಾಗ್ಯ ಈಗ ನನಗೆ ಸಿಕ್ಕಿದೆ. ನನ್ನ ಕೈ-ಕಾಲಲ್ಲಿ ಶಕ್ತಿ ಇರುವವರೆಗೂ ಕ್ಷೇತ್ರದ ಜನರ ಅಭಿವೃದ್ಧಿಗಾಗಿ ಶ್ರಮಿಸುತ್ತೇನೆ," ಎಂದು ಭರವಸೆ ನೀಡಿದರು.

ರಾಜಕೀಯವನ್ನು ಮೀರಿದ ಅಭಿವೃದ್ಧಿ: "ನಾನು ಕೇವಲ ಮತಗಳನ್ನು ಎಣಿಸಿ ಹಣ ಹಂಚುವ ವ್ಯಕ್ತಿಯಲ್ಲ. ಯಾರು ನನಗೆ ಮತ ಹಾಕಿದ್ದಾರೆ ಎಂದು ನಾನು ಎಂದೂ ನೋಡಿಲ್ಲ. 300 ಮತಗಳಿರುವ ಕಡೆಯೂ 15 ಕೋಟಿ ರೂ. ವೆಚ್ಚದ ಕೆಲಸ ಮಾಡಿಸಿದ್ದೇನೆ. ಪ್ರೀತಿ ಮತ್ತು ಕೆಲಸವೊಂದೇ ನನಗೆ ಗೊತ್ತು. ಬೇರೆಯವರ ಮೇಲೆ ಆರೋಪ ಮಾಡುವ ಬದಲು, ಜನರ ವಿಶ್ವಾಸ ಉಳಿಸಿಕೊಂಡು ಹೋಗುವುದು ನನ್ನ ಗುರಿ," ಎಂದು ಸಚಿವರು ಸ್ಪಷ್ಟಪಡಿಸಿದರು.

ದೇವಸ್ಥಾನ ನಿರ್ಮಾಣ ಸಮಿತಿಯ ಅಧ್ಯಕ್ಷರಾದ ಮಾಳಿಂಗ ಸಾಂಬ್ರೇಕರ್ ಮಾತನಾಡಿ, "ಹಿಂದೆ ಶಾಸಕರಾದವರು ಕೇವಲ ಭರವಸೆ ನೀಡಿ ಚಪ್ಪಾಳೆ ಹೊಡೆಸಿಕೊಂಡು ಹೋಗುತ್ತಿದ್ದರು. ಆದರೆ, ಲಕ್ಷ್ಮೀ ಹೆಬ್ಬಾಳಕರ್ ಅವರು ನಮ್ಮ ಊರಿನ ಅಭಿವೃದ್ಧಿಯ ಕನಸನ್ನು ನನಸು ಮಾಡಿದ್ದಾರೆ," ಎಂದು ಶ್ಲಾಘಿಸಿದರು.

ಪ್ರಕಟಿಸಿದವರು ಬಿಗ್ ನ್ಯೂಸ್ 24/7 ಕನ್ನಡ ದಿನಾಂಕ 2026-02-07 10:00:25