Shopping cart
Your cart empty!
ಬೆಂಗಳೂರು, ಜುಲೈ 04: ಆರ್ಥಿಕ ಸಂಕಷ್ಟದಲ್ಲಿರುವ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (BMTC) ಸಾಲದ ಒತ್ತಡದಿಂದ ಹೊರಬರಲು ಹೊಸ ಆದಾಯದ ಮಾರ್ಗವನ್ನು ಹುಡುಕುತ್ತಿದೆ. ಈಗಾಗಲೇ ಬಸ್ಸುಗಳ ಹೊರಭಾಗ ಮತ್ತು ಟಿಕೆಟ್ ಹಿಂಭಾಗದಲ್ಲಿ ಜಾಹೀರಾತು ನೀಡಲು ಟೆಂಡರ್ ಕರೆದಿರುವ ನಿಗಮ, ಇದೀಗ ದೇಶದಲ್ಲೇ ಮೊದಲ ಬಾರಿಗೆ ಬಸ್ಸಿನ ಒಳಗಡೆ ಸ್ಪೀಕರ್ ಮೂಲಕ ಆಡಿಯೋ ಜಾಹೀರಾತು ಪ್ರಸಾರ ಮಾಡುವ ಯೋಜನೆಗೆ ಮುಂದಾಗಿದೆ.
ಸಂಸ್ಥೆಯು ತನ್ನ ವ್ಯಾಪ್ತಿಯ ಸುಮಾರು 6,800 ಡೀಸೆಲ್ ಮತ್ತು ಎಲೆಕ್ಟ್ರಿಕ್ ಬಸ್ಸುಗಳ ಮೂಲಕ ಪ್ರತಿದಿನ 45 ಲಕ್ಷಕ್ಕೂ ಹೆಚ್ಚು ಪ್ರಯಾಣಿಕರನ್ನು ತಲುಪುತ್ತಿದೆ. ಈ ದೊಡ್ಡ ಪ್ರಯಾಣಿಕರ ನೆಟ್ವರ್ಕ್ ಅನ್ನು ಬಳಸಿಕೊಂಡು ಆದಾಯ ಹೆಚ್ಚಿಸಲು ಈ ಹೊಸ ಪ್ರಸ್ತಾವನೆಯನ್ನು ಸಾರಿಗೆ ಸಚಿವಾಲಯಕ್ಕೆ ಸಲ್ಲಿಸಲಾಗಿದ್ದು, ಶೀಘ್ರದಲ್ಲೇ ಅನುಮೋದನೆ ಸಿಗುವ ಸಾಧ್ಯತೆ ಇದೆ.
ಆದರೆ ಈ ನಿರ್ಧಾರಕ್ಕೆ ನಿತ್ಯ ಪ್ರಯಾಣಿಕರಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ. ಬಸ್ಸಿನೊಳಗೆ ನಿರಂತರವಾಗಿ ಸ್ಪೀಕರ್ ಮೂಲಕ ಜಾಹೀರಾತು ಪ್ರಸಾರ ಮಾಡಿದರೆ ಶಾಂತ ಪ್ರಯಾಣಕ್ಕೆ ಭಂಗ ಉಂಟಾಗುತ್ತದೆ ಹಾಗೂ ಮುಂದಿನ ನಿಲ್ದಾಣಗಳ ಮಾಹಿತಿ ಕೇಳಿಸದೇ ತೊಂದರೆಯಾಗುತ್ತದೆ ಎಂಬುದು ಅವರ ಆಕ್ಷೇಪ. ಬಿಎಂಟಿಸಿ ಪ್ರಯಾಣಿಕರಾದ ವಿದ್ಯಾಸಾಗರ್ ಮತ್ತು ಕಾಸಿರೇಗೌಡ ಸೇರಿದಂತೆ ಹಲವರು ಈ ಕ್ರಮವನ್ನು ಮರುಪರಿಶೀಲಿಸಲು ಆಗ್ರಹಿಸಿದ್ದಾರೆ.
ಪ್ರಕಟಿಸಿದವರು ಬಿಗ್ ನ್ಯೂಸ್ 24/7 ಕನ್ನಡ ದಿನಾಂಕ 2026-07-04 12:14:00
